Kyivde Rusiyeniñ doquz qatlı evge endirgen darbesi neticesinde elâk olğan daa bir insannıñ cesedi tapıldı, dep haber ete Devlet fevqulâde vaziyetler hızmeti.
«Solomenskıy rayonında 9 qatlı evde elâk olğanlarnıñ sayısı 18-ge arttı – qurtarıcılar yıqıntılar tübünden daa bir cesetni çıqardı», – dep aytıla haberde.
Umumen, hızmetniñ malümatına köre, iyünniñ 17-ne keçer gecesi Kyivde Rusiye ücümi neticesinde 23 insan elâk oldı, daa 134 kişi yaralandı. Qıdıruv-qurtaruv işleri devam ete.
Rusiye ordusı iyünniñ 17-nde Ukrayinağa daa bir kütleviy ava ücümini kerçekleştirdi. Ukrayina Silâlı quvetleriniñ Ava küçleri bildirgenine köre, Rusiye ordusı gece Ukrayinağa umumen 472 ava ücüm vastasını attı, hususan 32 raketanı. Ava mudafaa quvetleri umumen 428 Rusiye nişanını tesirsiz alğa ketirdi.
Kyiv ve vilâyette iyünniñ 18-nde Matem künü ilân etildi. Yerli akimiyet Kyivniñ yedi rayonında zararlar aqqında bildire. Ukrayina İç işler naziri İğor Klımenko bildirgenine köre, çoq qatlı evniñ kirişlerinden birini bütünley yoq etken Rusiye raketası o qadar teren kirdi ki, mağaznıñ beton töşemelerini teşti.
Rusiye Mudafaa nazirligi ise Kyiv vilâyetinde ve Zaporijjâda Ukrayinanıñ arbiy-sanayı kompleksiniñ obyektlerine «tam yüksek silâ» ve dronlarnen kütleviy darbe aqqında bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
