İyünniñ 18-ne keçer gecesi Rusiye ordusı 58 dronnen ücüm etti, 30-ı yoq etildi, dep bildirdi Ukrayina Silâlı quvetleriniñ Ava küçleri.
Haberge köre, Rusiye Shahed ve diger taqlit uçucısızlarnı qullandı: Kursk, Primorsko-Ahtarsk, işğal etilgen Qırımnıñ Çavda burnundan. Esas yönelişleri Donetsk, Dnipropetrovsk ve Zaporijjâ vilâyetleri oldı.
Ukrayina Silâlı quvetleriniñ Ava küçleri bildirgenine köre, saat 08:30-ğa qadar memleketniñ şarqı ve şimalinde 30 Shahed uçucısızı yoq etildi: 12-si ateş vastalarınen tüşürildi, 18-i radioelektron küreş vastalarınen coyuldı.
Ukrayina Silâlı quvetleri haber etkenine köre, 9 yerde ava ücüm vastaları darbe endirdi.
Rusiye arbiyleri Ukrayina regionlarına çeşit silâ qullanıp muntazam surette ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastrukturalarına, hastahaneler, mektepler, bala bağçaları, energetika ve suv teminlevi obyektlerine ücüm etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
