Ukrayina Yuqarı Şurasında Ukrayinanıñ vaqtınca işğal etilgen topraqlarında, Qırım Muhtar Cumhuriyetinde ve Aqyar şeerinde devlet akimiyeti ve yerli öz-özüni idare etüv meseleleri alt komiteti teşkil etildi. Bu aqta Yuqarı Rada deputatı Tamila Taşeva Facebook saifesinde bildirdi.
Mütenasip qararnı Ukrayina Yuqarı Radasınıñ Devlet akimiyetiniñ teşkil etilmesi, yerli öz-özüni idare etüv, regional inkişaf ve şeer qurucılığı meseleleri Komiteti qabul etti.
Bu komitet şöyle yönelişler üzerinde çalışacaq:
- işğalden azat etilgen soñ ukrayin akimiyeti ve yerli öz-özüni idare etüvniñ ğayrıdan tiklenüvi;
- memuriy-territorial qurulış meseleleri;
- Qırım Muhtar Cumhuriyeti ve Aqyar şeeri akimiyet organlarınıñ statusı;
- Ukrayina prezidentiniñ Qırımdaki Daimiy temsilcisiniñ faaliyeti;
- tamır halqlarnıñ vekilleri, hususan qırımtatar halqınıñ vekilleri ile özgünlikni saqlav ve reintegratsiya siyasetini şekillendirüv boyunca işbirlik;
- ealiniñ öz-özüni teşkil etüv organlarınıñ meseleleri.
"Atta qıyın halqara vaziyette de biz azır olmalımız: ukrayin qanunlarını qaytarmaq, insanlarnıñ devletke işançını ğayrıdan tiklemek, azat etilgen topraqlarda lâyıq kelecekni temin etmek", — dep qoştı Taşeva.
Ukrayina prezidenti Volodımır Zelenskıy Qırım işğaline qarşılıq Kününe yarımadanıñ işğalden qurtarıluvı meselesi halqara kün tertibine qaytarıldı, dep bildirdi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
