"Qırım musulmanları davasınıñ" mabüsi Lenur Seydametovnı Lipetsk vilâyetiniñ Yelts şeerindeki apishaneden etapqa çıqardılar. Soñki noqta Rusiyeniñ Amur vilâyetindeki Srednebelaya köyündeki 3-nci tüzetüv koloniyası olacaq, dep bildire "Qırım birdemligi" onıñ qadını Adjira Seydametovağa atıf etip.
Aqayınıñ mektübinde aytıla ki, Seydametov bir qaç müessisede bulunğan edi, amma karantin sebebinden bulunğan yerini aytıp olamadı.
"Şimdi, etap keçken soñ, oña nasıl barmaq kerek olğanını tüşünmek kerek. [Seydametovlar qorantası yaşağan Aqmescitten] bu 8,2 biñ kilometr . Allahnıñ yardımı ile er şeyni yeñermiz", — dep paylaştı qırımlınıñ qadını.
2021 senesi kiçik aynıñ 17-nde Qırımda Qarasuvbazar, Bağçasaray, Aqmescit, Aqyar ve Sovet rayonında kütleviy tintüvler keçirildi. Lenur Seydametov, Timur Yalqakov, Azamat Eyupov, Yaşar Şihametov, Ernest İbragimov ve Oleg Fedorov, yaşağan yerlerinde tahqiqat tedbirleri keçirilgen soñ, olar Qırımdaki Rusiye FSB-siniñ idaresine ketirildi.
Qırımtatarlar Rusiyede yasaq etilgen, amma Ukrayina ve dünyanıñ bir çoq memleketinde milliy qanunlar seviyesinde sıñırlanmayıp faaliyet köstergen "Hizb ut-Tahrir" diniy teşkilâtınıñ faaliyetine alâqası olğanında qabaatlandı.
2022 senesi saban ayında Seydametov 13 yılğa azatlıqtan marum etildi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.